DC GIDARYA WA ILEJE AONGOZA KIKAO KAZI CHA VIONGOZI WA KATA NA VIJIJI

Imewekwa: October 10th, 2021

Katika kuhakikisha kuwa mnyoroo wa maendeleo wilayani Ileje unaunganishwa vema kutoka ngazi ya wilaya hadi kwa mwananchi mmoja mmoja Mkuu wa  Wilaya hiyo amefanya kikao na viongozi wa vijiji na kata.

Kikao hicho cha siku moja kimefanyika katika Ukumbi wa Sekondari ya Itumba kimeweza kuwakutanisha Kamati ya Usalama,Wah.Madiwani,Wakuu wa Idara na Vitengo,Watendaji wa Vijiji na Kata pamoja na Wenyeviti wa Vijiji.

                         Yaliyojiri katika kikao hicho:

• Wenyeviti wa Vijiji waliweza kuwasilisha kero mbalimbali yakiwemo malalamiko ya kutopata posho za madaraka,asilimia za vijiji na upungufu wa watumishi.
• Kero ya watendaji wa kata na vijiji kutopewa asilimia ya motisha iliyopitishwa pale wanapowasilisha mapato.
• Ubovu wa miundombinu ya barabara hususani barabara ya Sapanda/Luswisi kunakozalishwa mbao laini kwa wingi.
• Kutotembelewa kwa baadhi ya maeneo na viongozi mbalimbali.

              Kutolewa kwa majibu ya kero zilizotolewa

       Maafisa kutoka Ofisi ya Mkurugenzi Mtendaji Wilaya waliweza kutolea     maelezo na majibu juu ya kero zilizokuwa zimetolewa hawa ni pamoja na Afisa Utawala na Utumishi,Afisa Kilimo Umwagiliaji na Ushirika,Mweka Hazina pamoja na Afisa Mifugo na Uvuvi.

Aidha Mkurugenzi Mtendaji wa Halmashauri hiyo Ndg.Geofrey Nauye pamoja na Mwenyekiti wa Halmashauri Mhe.Ubatizo walitoa ufafanuzi wa masuala kadhaa yaliyokuwa yameulizwa.

Pia Wahe.Madiwani waliweza kutoa maelezo juu ya kero zilizokuwa zimewasilishwa zikilenga maeneo yao.

               Alichokisema Mkuu wa Wilaya kuhusu kikao hicho

“Kikao hiki ni muhimu kwetu kwani sisi ni watekelezaji na wasimamizi wa mipango ya serikali na wananchi ni mabosi wetu,tupo hapa wote ili tutoke na uelewa wa aina moja ili tuweze kuwahudumia vizuri hawa wananchi ambao huweka serikali madarakani”DC wa Ileje Mhe.Anna Gidarya.

                                   Maagizo ya DC Gidarya kwa viongozi hao:

• Viongozi wote kuhakikisha wananchi wanasomewa mapato na matumizi ya vijiji pamoja na fedha za miradi ya maendeleo.
• Suala la usafi wa mazingira ukiwemo ujenzi wa vyoo bora ambayo ni kampeni inatakiwa isimamiwe na kila kiongozi na ukaguzi utaanzia kwa  viongozi hao.
• Kwenda kutoa elimu kwa wananchi matumizi sahihi ya barabara hususani ya Mpemba/Isongole baada ya ajali kutokea mara kwa mara nyingi zikisababishwa na mikokoteni inayokokotwa na ng’ombe
• Kuwabana wachafuzi wa barabara hiyo ya Mpemba/Isongole wanaochafua kwa ulaji wa miwa usizingatia usafi wa mazingira.
• Wito wa kujiandaa juu ya zoezi la Sensa ya Watu na Makazi itakayofanyika hapo mwakani.
• Kuwaagiza viongozi hao kwenda kutoa elimu juu ya chanjo ya UVIKO-19 na kuondoka na dhana finyu juu ya propaganda zinazopigwa na baadhi ya watu.
• Kwenda kutoa elimu kwa wananchi juu ya lishe ili kuondokana na udumavu unaowakumba wakazi wengi wa Mkoa wa Songwe.
• Watendaji wa Vijiji na Kata wenye madai walipwe posho zao ili kuwapa moyo wa kufanya kazi ukiwemo ukusanyaji wa mapato ya ndani.
• Hakikisheni hamtelekezi miradi ya maendeleo  katika maeneo yenu kwani ninyi mnategemewa na wanachi kwa kila jambo.
• Watendaji wengi wa vijiji na kata ni vijana na wapo kwenye vijiji mbavyo wenyeviti wake ni wazee,hivyo akawataka masikio yasizidi masikio kwa kuwadharau viongozi hao.
• Kwa ujumla kikao hicho kimewawezesha viongozi hao kupata mwelekeo wa uongozi wa Mkuu wa Wilaya hiyo.