MIICO waungana na Mkuu wa Mkoa wa Songwe kupambana na udumavu kwa watoto

Imewekwa: November 20th, 2021

Wakati Mkoa wa Songwe ukiendelea na kampeni ya kutokomeza udumavu kwa watoto jumla ya watoa huduma 38 kutoka maeneo mbalimbali ya Wilaya ya Ileje wanapatiwa elimu ya kukabiliana na tatizo hilo.

Mafunzo hayo ya siku mbili yamefanyika katika Kituo cha Kuendeleleza Walimu cha Itumba yameendeshwa na Shirika la MIICO kwa kushirikiana na shirika la PIKOLTO.

Bi.Anna Minja Afisa Lishe wa Shirika hilo kwa mikoa ya Songwe na Mbeya amesema kuwa walengwa wanaopata mafunzo hayo ni Maafisa Kilimo wa Kata pamoja na watoa huduma wa Afya Vijijini.

Ameongeza kuwa lengo kuu la mafunzo hayo ni kuwawezesha wananchi katika maeneo yao kuweza kuzalisha kwa urahisi mazao ya mbogamboga na matunda na kujua jinsi ya kuyatumia

Afisa huyo ameongeza kuwa watoa huduma hao wanatarajiwa kwenda kuiwezesha jamii kuzalisha mazao ya bustani kwa kutumia mbolea za asali pamoja na dawa za kuua wadudu badala ya kutegemea mbolea za viwandani pamoja na madawa ambayo kwa ujumla huwa na madhara kwa watumiaji.

Bi.Joyce Kayinga kuoka Kijiji cha Shinji ameeleza kufurahishwa na mafunzo hayo huku akitoa wito kwa wananchi kuwa na mwitikio wa kulima bustani pamoja na kutoa lishe bora kwa watoto.

Akizungumzia mafunzo hayo Afisa Kilimo anayeshughulikia mazao ya mbogamboga na Matunda katika Wilaya hiyo Ndg.Alkaid Mzava amesema kuwa Idara ya Kilimo,Umwagiliaji na Ushirika inaendelea kushirikiana na wadau mbalimbali katika kuhakikisha kuwa Wilaya ya Ileje na Mkoa wa Songwe elimu ya lishe bora kwa jamii inaleta mabadiliko chanya kwa jamii.

Hayo yakijili Wilayani Ileje Mkuu wa Mkoa wa Songwe Mhe.Omary Mgumba hivi karibuni aliwataka wananchi kuondokana na kasumba ya ulaji wa chakula cha aina moja hali itakayosaidia watoto kuondokana na udumavu.